Vuhosinkulu bya Vatsonga Machangana

Eka: Rixaka ra Vatsonga Machangana

Ndzi losa vavukosi, swirho, vaseketeri, valandzeri va PVM na swiyenge hinkwaswo va rixaka ra Vatsonga Machangana.

Nhlangano wa PVM ku nga, Pfukani Vatsonga Machangana, wu nga nhlangano lowu yimelaka timhaka ta ririmi na ndhavuko wa Vatsonga,  hambileswi ku nga ku hlongorisa huku hi khome munyu, hi lava ku veka matitwelo na mavonelo ya hina eka xiviko lexi nga ta humesiwa hi va Rixaka Forum mayelano na Vuhosinkulu bya Vatsonga Machangana. Leswi swi landzela ku ya hi xitiviso xa vona hi siku ra 03 Hukuri 2020 eka MLFM.

Hi lava ku swi veka erivaleni leswaku a hi fambisani na ku hlawuriwa ka vito rihi kumbe rihi ra hosi ku va hosinkulu ya rixaka ra Vatsonga Machangana.       A hi nge seketeli swiboho leswi pfumalaka tshaku. A hi nge miyeli loko lavanga na matimba va ya tirhisa ku teka swiboho leswi tisaka ku avana eka rixaka ra hina.

Nkwetlembetano lowutekeke nkarhi woleha swonghasi, i xikombiso xa leswaku mhaka ya Vuhosinkulu bya Vatsonga a yi vanga kona, na sweswi a yi kona. Xiboho xo ta na vito a xi nge tisi xintshuxo hambi ku ri vun’we eka rixaka hinkwaro.                                                                                                         Nhlangano wa PVM wu vona vukosi hinkwabyo hi ku ringana, ku nga ri na lebyi nga ehenhla ka byin’wana.

Xintshuxo eka mhaka ya mafambiselo ya rixaka ra Vatsonga, i ku simekiwa ka huvo ya vukosi leyinga ta va na matimba yo tirhana na timhaka ta rixaka hinkwaro.

Khanimamba Tat.  SMS Khosa                    

Mutshamaxitulu: Pfukani Vatsonga Machangana                                                                                        

Riqingho: 083 304 2469 – Vodacom                                                                                                                  

Imeyili: Supasem@hotmail.co.za