Gezzo Da Caphar I muyimbeleri wa House ya Xitsonga

Muyimbeleri wa vunanga bya house ya Xitsonga Da Caphar u sungule ku yimbelela hi lembe ra 2014 kambe hi lembe ra 2013 hi laha a nga sungula ku va na ku navela ku nghenelela eka swa vuyimbeleri tani hi leswi tatana wa yena a ri xiyimbeleri xa vunanga bya Gospel. Laha a nga sungula ku hamba aya nghena a Studio xa tata wa yena loko a nga ri kona ekaya, a sungula ku ti dyondzisa ku chaya.

Da Caphar u ri mintlhotlho leyi a hlanganaku na yona tani hi muyimbeleri i ku pfumaleka ka switirhisiwa swo chaya hiswona. Mi nkarhi yin’wani i ku sungula ku endla risimu ku suka ehansi, tani hileswi swi lavaku ku tiyimisela swinene. Da Caphar u vule leswaku ku endla risimu ri hela, a swi n’wi tekeli na siku kambe u endla a karhi a vuyelela eka rona masiku mo hundza mune leswaku a kota ku endla swilo swo tiya notlhela swiva leswi nga ta tsakisa vaseketeri va yena.

Da Caphar u vule leswaku va seketeri va yena va rhandza vunanga bya yena swinene ngopfu, naswona vuseketeri bya vona byile ka xiyimo xa le henhla swinene. Laha a nga kombisa leswaku lembe leri hi kona a lavaku ku sungula ku endla album, laha a nga kombisa leswaku ku sukela hi 2016 a humesa tinsimu hi rin’we rin’we. Album yona yi ta vitaniwa “The Days of Our Lives”, tani hi leswi a yimbelela ku hi swilo leswi humelelaku siku na siku.

Vunanga by Da Caphar byi kandziyisiwa eka “Afro Groove Entertainment” leyi kunga ‘recording studio’ leyi a nga yi sungula na munghana wa yena Godfrey Luvhengo “King Kālu”. Ti CD ti tava ti sungula ku kumeka eka lembe leri hiyaku ka rona, eka nkarhi wa sweswi tinsimu ta yena ti kumeka eka ‘internet’.

Da Caphar uri u hlohloteriwe hi tatana wa yena kuva muyimbeleri laha a nga va naku navela leswaku na yena eka rin’wani ra masiku ati kuma ari xiyimbeleri xa ndhuma swinene. Loko miri na ku tsakela eka ku tihlanganisa na xiyimbeleri lexi, minga ti hlanganisa na xona eka nomboro ya rinqingho leyi landzelaku 060 868 5175, eka Facebook: Gezzo Da Caphar Mphata Facebook Page: Gezzo da Caphar n King Kalu Kumbe eka Instagram: Da_Caphar98

Swintshundzuxo leswi a nga na swona hi leswaku; munhu u fanele ati tiva na swona a languta leswaku u lava ku yimbelela vanhu va njhani no tlhela a nga vi na nhlamba hikuva a swi laveki tani hileswi tinsimu ti yingiseriwaka na hi vana lava ntsongo, hi fanele ku xixima vayingiseri.

Da Caphar u velekiwile etikweni ra Ntlhaveni Block H eka Makahlule. Da Caphar ka hari jaha leri nga le xikolweni laha eka lembe leri ri nga le ku lwisaneni na ntangha khume, na swona riri ri na ku hiseka eka ku yisa swa tidyondzo ta rona emahlweni tani hi leswi eka swa vuyimbeleri kunga na swo tala swinga endleka leswaku munhu awa eka swona.

U yile emahlweni a vula leswaku u rhandza ku tirha na vanhu vaku hambana-hambana, tani hileswi Xitsonga xinge munhu i munhu hi van’wani vanhu. Leswi swi pfuna leswaku munhu a dyondza swilo swintshwa. Eka vuyimbeleri u tirhisana na Vukona Maswanganyi, Vally Nobela na Godfrey Luvhengo “King Kalu”

Da Caphar u ri ‘’ eka swiyimbeleri hinkwaswo leswi swi ngaku endleni ka leswaku ririmi ra hina ra Xitsonga ri kula, ahi yiseni ntirho emahlweni. Na vaseketeri va yena avayi mahlweni va n’wi seketela leswaku hivunwe hikota ku tlakusa ririmi riya emahlweni’’.

Mutsari: Maluleke Dumisani Happy

Related posts