Vumunhu

Vumunhu i ku va munhu a kota ku hanya na van’wani vanhu ku nga ri ku sola van’wani vamakwerhu kumbe kuva avanyisa eka leswi vanga na swona kumbe leswi va nga hi xiswona . Vumunhu i kuva na rirhandzu eka munhu un’wani na un’wani u nga langutisi ku ya hi nghohe. Vumunhu i ku kota ku twisisa xiyimo xa un’wana hiku xi teka u xi vuyisa eka wena n’winyi kumbe ku ambala tintanghu ta yena.

Vanhu votala lava va nga ni nkateko wa kuva kona eka misava leyi a va na byona vumunhu. Ndzi ehleketa khale loko haha kula vakokwana a va hi dyondzisa ku va na vumunhu hiku hi kombisa leswaku a hi fanelangi ku hleka un’wani makwerhu, hikuva a hi swikota ku hleka un’wana loko ari ni timbhandhukwana kumbe loko wansati ari ni malebvu no tlhela hi hleka vantsoniwa ni vadyuhari.

Vakhale a va hi tshinya na ku hi lemukisa leswaku loko u hleka mutsoniwa na wena uta bebula n’wana wa mutsoniwa. Leswi a ko va xikombiso mhaka nkulu hi leswaku u nga tshuki u hleka xiyimo xa wu n’wani makwerhu hikuva awu swi tivi ku leswaku u fikile njhani eka xiyimo xexo. A ku na loyi a tsakelaka ku hlupheka kumbe ku pfumala vana. A ku na loyi a tsakelaka ku hanya evusiwaneni no tlhela a pfumala kumbe ku xaniseka.
Vamakwerhu a hi tateni timbilu ta hina hi vumunhu, hi hanyeka, hi va na twela vusiwana no tlhela hi kota ku twisisa swiyimo swa van’wani. Misava yi nga va xivandla xo hlawuleka ku hanya eka yona. Ku va tiko ra ntswamba ni vulombe hi hanya hiku rhula.

Dyambu leri a ri na n’winyi, nsimbhi a yi goveki a yi kona eka leyi misava, hi vone vo tala yi va tlatlalata, Tsotsi leyi va nge i Karma loko yo ku fikela swilo a swi nga ha nandzihi. Uta lumbeta vanhu vuloyi u nga loyiwanga.

Va vutlharhi vaku, u nga hleki nyoka loko yi famba hi khwiri, a wu swi tivi leswi nga ta ku humelela mundzuku.

Mutsari: Tiringanile Kusaseka Holeni
Edited by: Maluleke Dumisani Happy