Pfukani Vatsonga Machangana Bulu No. 50-Ndzhati 2019

1. Ku Xeweta:

Ndza mi losa hinkwenu eka n’hweti ya Ndzhati leyi tiviwaka tani hi n’hweti ya ndhaka.Ndzi na ku tshemba leswaku vunyingi bya hina ha swi tiva leswaku hi tlangela ndhaka hi siku ra makumembirhimune. Nakambe n’hweti leyi i masungulo ya lembe ra hina Maafrika.
Ndzi vona ku tlangela siku leri swi nga hetisekanga tani hi leswi eka tindzhawu ta ndhaka to ringana khume eka xifundzhankulu xa Limpopo ku nga katsiwanga ndzhawu na yin’we leyi nga ni matimu ya hina Rixaka ra Vatsonga. Vurhongo a byi nge khomi eka PVM loko mhaka leyi yi nga si humelela, ndza hlambanya.

2. Tinhlengeletano ta Pfukani Vatsonga Machangana:
Nhlengeletano ya Ndzhati ya Vurhangeri yi kunguhatiwile ku va kona hi siku ra khumetsevu hi awara ya n’we na nhlekani eSoweto.
Nhlengeletano ya vaaki leyi veke kona hi 24 Mhawuri 2019 yi fambe swinene. Hi rhandza ku khensa Meyara wa masipala wa Collins Chabane ku va va rhumele mukhanselara Tat. Chauke GH eka nhlengeletano. Hi khensa nseketelo na ku tshemba leswaku pfhumba ra hina ri ta humelela.
3. DTT/Digital Terrestrial Television:
A ku na hungu rintshwa eka xiyenge lexi, kambe loko mi ri na swivutiso hi ta landzelerisa.

4. Miletelodyondzo:

Hikokwalaho ko tlangela n’hweti ya ndhaka, ndzi vuyisela hungu leri: SAHRA – South African Heritage Resource Agency. Xiyenge lexi xi tumbuluxiwile ehansi ka nawu wa ndhaka ya rixaka wa 25 wa 1999. Ntirho wa SAHRA i ku lawula na ku sirhelela ndhaka ya tiko.

5. A mi swi tiva ke?

Leswaku Vuphati byi pfuna ku hlayisa matimu na ndhaka ya rixaka ke? Hambi leswi va UNESCO va hlawuleke siku ra Makumembirhin’we Nyenyankulu, loko hi ri karhi hi tlangela ndhaka laha kaya swa fanela hi tiphata. Xiphato xo koma xa KHOSA. “Hi VaMagelevende Mahlongola N’weti, hi huma kaMagudu Enkanyini, VaRipanga ro xeka tinhlanga ta mavele, VaMangatlu ava hungeli va hungela tuva xi nga na vutoya, Hi vajambali xaMavone eKhoseni”
Khanimamba