Pfukani Vatsonga Machanga Bulu No. 44 Nyenyankulu 2019

1. Ku Xeweta:

Ndza mi losa

Ndza tshemba leswaku n’hweti ya Nyenyankulu tani hi tin’hweti tinwana ta lembe, yi na migingiriko yo tala swinene, swi nge koteki ku longoloxa migingiriko leyi hinkwayo. N’hweti ya Nyenyankulu i n’hweti ya timfanelo ta ximunhu laha Afrika Dzonga, kasi ntirho lowu hi wu tlangela hi siku ra makumembirhin’we lembe na lembe endzhaku ka mfumo wa xihlawuhlawu.
2. Tinhlengeletano ta Pfukani Vatsonga Machangana:
Nhlengeletano ya Nyenyankulu ya Vurhangeri yi ta va kona hi siku ra khumentsevu ejoni.

3. DTT/Digital Terrestrial Television:

A hi si kuma hungu rintshwa eka xiyenge lexi, kambe ndzi rhandza ku tlhela ndzi mi tsundzuxa leswaku nkarhi lowu vekiweke wa vuhundzuluxi bya mahaxelo ya ximanguva lawa i Mawuwani 2020.

4. Miletelodyondzo:

Tani hi laha ndzi kombiseke ha kona eka bulu ra makumemunenharhu hi Nyenyenyani 2019, mayelano na nhlengeletanonkulu ya vumune, “4th National Consultative Conference)” ya CRL Rights Commission, ndzi hlawuriwile ku ya yimela PVM. Nhlengeletano a yi vulavula hi swilo swi nharhu leswi Khomixini yi langutaneke na swona, ku nga, Ndzhavuku, Vukhongeri na Ririmi. Ndzi lulamisile xiviko xa mune wa mapapila lexi ndzi xi rhumeleke Vurhangeri bya PVM. Lava tsakelaka xiviko lexi, ndzi nga va rhumela eka imeyili loko va kombisa ku tsakela.

5. A mi swi tiva ke?

Leswaku, hi siku ra makumembirhin’we Nyenyankulu magidimbirhikhumekaye, i siku ra Vuphati Emisaveni Hinkwayo, ku nga “World Poetry Day” hi ririmi ra vadyivahlampfi ke? Siku leri ri funghiwile na hi UNESCO. Loko mi nyikiwa nkarhi wo vulavula, mi nga chavi ku tiphata hi siku leri, mi ta va mi nga hambukanga endleleni.
Khanimamba