Vatsoniwa va nyikeriwa hi switirhisiwa eka Mushwana Disability Centre

Va kereke ya Consuming fire global assembly na va nhlangano wa No stains initiative va endzerile ndhawu ya vatsoniwa ya Mushwana Disability Centre ku ya nyikela vatsoniwa lava hlayiseriwaka eka ndhawu leyi hi switirhisiwa swo hambana-hambana.

Mudyondzisi wa xikolo lexi manana Tsakani Chavalala lava nga sungula ku tirha lembe leri nga hundza hi Khotavuxika va vula leswaku va tsakile swinene hi leswi nga nyikeriwa, vana va ta kuma swo ambala hi khisimusi, kasi vanhwana vona va ta kuma switirhisiwa swo pfuna loko va vona n’weti. “Mintlhotlho yona yi kona leyi hi hlanganaka na yona na ku biwa ha biwa, hi tsutsuma minkarhi yin’wani. Ku vula manana Tsakani Chavalala, hambiswiritano, va yi emahlweni va kombisa mhaka ya leswaku va nkhensa swinene ku va minhlangano leyi yi va endzerile na ku nyikela.

Hi burisanile na Tatana M.G. Chauke lava ku nga van’wana lava hlayisiwaka na ku lateriwa eka Mushawana Disability Centre. Va vurile leswaku va ti twa va tsakile swinene, leswi swi vula leswaku mintlhontlho leyi va nhlanganaka na yona siku na siku, ya vonaka na swona ndhawu ya vona ya karhi ya hanya. Va tlhela va kombisa leswaku ku nga va mhaka ya kahle leswaku na yin’wani minhlangano yi nga hoxa xandla ku pfuna leswaku vutomi bya vona byi ta olova. Veri dyondzo-nkulu leyi va nga yi kuma I ku amukelana na ku rhandzana tani hi vatsoniwa. Va tata ku nkhensa loko minhlangano leyi yi vile na xivono xa ku va endzela na ku hoxa xandla hi laha va nga kota ha kona.

Hi tlhele hi va na nkateko wo burisana na murhangeri wa senthara ku nga manana Nkhensani Rose Chauke, va vula leswaku siku ra numuntlha ri va endle hi tintswalo, va nkhensa swinene leswi minhlangano leyi yi nga va endlela swona, hambiswiritano va kombisa leswaku Mintlhontlho ya ha ri kona leyi katsaka ku pfumaleka ka swakudya na ndhawu yo tirhela eka yona tanihi leswi laha va tirhelaka kona sweswi va nga lo kombela ku tirhela kona.

Va kombisa leswaku swi kona swiyenge leswi nga kombisa ku tsakela ku va pfuna kambe swi vulavula ntsena a ku vangi na nhlanga yo baleka ngati, kambe ku fika sweswi a va se ringeta ku tinhlanganisa na swiyenge swa mfumo ku kombela mfuneto. Xivono lexi va nga na xona i ku kuma ndhawu leyi va nga ta yi vitana kaya, ku kuma mpfuneto wa swakudya, vuleteri eka vatsoniwa va vona na switirhsiwa hinkwaswo swa dyondzo.

“Ndzi tata ku nkhensa eka minhlangano leyi mbirhi, ndzi ri laha va nga susa kona leswi va nga hi nyikela xikwembu xi swi andzisa hi kambirhi, leswaku va ta tlhela va vuya eka nkarhi lowu taku va ta hi pfuna. Inkomu.

Hi Sydney Khanyi