Pfukani Vatsonga Machangana -Bulu – No. 40 – Hukuri 2018

1. Ku Xeweta:

Ndza mi losa

Ndza tshemba leswaku vunyingi bya hina ha swi tiva leswaku eka n’hweti leyi ya Hukuri hi lemukisiwa hi pfhumba ra khume-ntsevu wa masiku ro lwisana na madzolonga hambi kuri ku xanisiwa ka vaManana na Vana. Pfhumba leri ri sungula hi siku ra vumakumembirhi ntlhanu (25) Hukuri ku fika hi siku ra vukhume ra N’wendzamhala.

2. Tinhlengeletano ta Pfukani Vatsonga Machangana:
Nhlengeletano ya Hukuri ya EXCO yi ta va kona hi ti 17 hi awara ya mbirhi na nhlekani (14h00) eJoni.

3. DTT/Digital Terrestrial Television:

Ndzawulo ya Vuhlanganisi yi tivisile ku engeteriwa ka nkarhi wo hundzuluxa vuhaxi bya analog ku ya eka DTT. Nkharhi lowu wu engeteriwa ku suka eka lowu a wu vekiwile wa Khotavuxika 2019 ku ya eka Mawuwani 2020.

4. Miletelodyondzo:

Nhlangano wa Pfukani Vatsonga Machangana wu vile na nkateko wo endleriwa miletelodyondzo hi CRL Rights Commission hi siku ro sungula ra Hukuri 2018. A va avelana na hina hi vusompfa lebyi endliwaka eka vukhongeri hi van’wani vavarhangeri. Ndza tshemba ha karhi ha yi twa ndhuma emahungwini, vanhu va dyisiwa timbyana, va fafazeriwa hi mirhi yo dlaya switsotswani, ku hlaya i ku xurha. Maendlelo lawa ya yisa ndzhuti xa vumunhu ehansi, ya hambukisa vanhu ni ku sorisa ntirho wa Xikwembu. Kutani hi fanele kutivonela eka ntungu lowu.

Ndzi khensa hinkwavo lava koteke ku fika eka siku rero.
5. A mi swi tiva ke?

Leswaku swibokisani leswi vuriwaka STB – Set Top Box, a swi nge he endliwi hi xikongomelo xa DTT ke? Ndzawulo ya Vuhlanganisi yi vula leswaku ku ta endliwa tiThelevhixini leti nga na vuswikoti byo amukela vuhaxi lebyi. Thelevhixini ya muxaka lowu yi vuriwa iDTV – Intergrated Digital Television. (Vonani PVM Bulu 03 – 2016). Leswo, Free State xi ta va xifundzha xo sungula ku cincela eka vuhaxi bya DTT ku sukela hi 31 N’wendzamhala 2018 a mi swi twile ke?

Khanimamba

Tat. SMS Khosa: Loko u ri na xo xi vula loko u nga xi vuli xi ta vuriwa hi mani? PVM NEWSLETTER