Pfukani Vatsonga Machangana Bulu 09 – 2018

1. Ku Xeweta:

Ndza mi losa

Ndzi tlhela ndzi mi tsundzuxa leswaku, Ndzhati i n’hweti ya ndzhaka laha Afrika Dzonga. Kasi sikunkulu ro tlangela iti 24. Ndzhaka yi katsa swilo swo hambana hambana ku nga va, Miako, Tindzhawu, Swivatliwa, Ririmi, Vutivi, Swakudya, Swiambalo na swin’wana swo tala. Swilo leswi hinkwawo swi fanele ku hlayisiwa no yisiwa emahlweni.

2. Tinhlengeletano ta Pfukani Vatsonga Machangana:
Nhlengeletano ya Ndzhati ya EXCO yi ta va kona hi ti 15.

3. DTT/Digital Terrestrial Television:

Afrika Dzonga ri ta rhurhela nhlengeletano ya mune wa masiku ya ITU – International Telecommunication Union, ku suka hi ti 10 ku fika ti 13 Ndzhati 2018. Hi na ku tshemba leswaku swi nga tisa swin’wana swa swintshunxo eka vuhundzuluxi bya DTT laha tikweni.

4. Miletelodyondzo:

Tani hi laha hi tshembiseke ha kona, hi ta avelana na n’wina swintsongo leswi hi swi tivaka.
SAHRA – South African Heritage Resource Agency, yin’wani ya mintirho ya xiyenge lexi, i ku hlayisa tindzhawu ta ndzhaka, leswaku, rixaka lera ha taka ri ta kuma ta ha hlayisekile.

5. A mi swi tiva ke?

Leswaku, hambi leswi ku nga riki na matsalwa yo tala lawa seketelaka mhaka leyi, ku vuriwa leswaku masungulo ya lembe ra hina va ka Vantimeni ku katsa na hina Vatsonga, i Ndzhati ke? Leswi swi seketeriwa hi ku hluka ka misinya, hi vona tinyenyani ta mixakaxaka, switsotswani, Xirimele(xijumba xa Tinyeleti leti kombisaka nkarhi wa xirimo) na swin’wana swo tala. Khalendara ya Ethiopia leyi hi nga bula hi yona n’hweti leyi nga hundza, na yona yi seketela mhaka leyi. (Mi nga languta na tsalwa leri vuriwaka “African Water Calendar” ra va KARA Heritage Institute ya Dr. Mathole Motshekga.

Hi 08 Ndzhati i siku ro lemukisiwa hi ku tsala no hlaya emisaveni hinkwayo (International Literacy Day). Siku leri ri funghiwile na hi va UNESCO. Ka ha ri na nhlayo leyikulu ya lava nga koteki ku hlaya na ku tsala, kasi lavakulu va nga pfuneka eswikolweni swa ABET.
Khanimamba

Tat. SMS Khosa Mutshamaxitulu: Pfukani Vatsonga Machangana Riqingho: 083 304 2469-Vodacom
Loko u ri na xo xi vula loko u nga xi vuli xi ta vuriwa hi mani?