XIRILO

Yingisani rito ra xivangelo
Rito leri nga na torha ro phofula
Rito leri nga tsoniwa tindleve.
Ritavi u khuluka a khapa emarhameni ya mina.
Byongo byi khoma hi vusindza, swi ala ku anakanya!

Lexi i xirilo xa ntshumbu lowu nga na vutomi.
Vumunhu bya mina byi nga cheleriwa sirha,
Ndza ha dya mavele emasaneni ya dyambu.
Tolo u fambile na vumunhu na rirhandzu
Tintswalo na vun’we swi va xihlambanyiso

Namuntlha wa bava wa khalakhasa!
Vumunhu byi borile, byi nyakapfarile,
Byi vhundzile, byi huma swirhikirhiki.
Ndzi rila vana va-Afrika va nga hundzuka swiharhi
Ndzi rila vununa bya wanuna wa Afrika,
Byi nga londzota hi tinsumba, n’winyi a ha dya mavele
We’ Hosi wa ndzi twa ke?

Ndza chava ku languta wanuna wa Afrika.
Ndzi hava mahlo yo tlanga hi wona mathumbhani.
Wanuna wa Afrika u dyiwile hi misava,
Mbilu ya ha ba exifuveni
Wanuna wa Afrika, wa nyenyetsa u hlambisa timbilu

Ya rila yindlu ya ka Eva! yi ba nkalanga!
Ndzi fela rimbambu u nga ndzi pambulela ke?
Xana ku hambana ka rimbewu na hina i ndzukano ke?
Xidyoho xa kona i xa muhlovo muni?
Ndzi hlamuleni n’wina va swo boha

Ticece na vavasati hi nghenelwe!!
Hi hundzukile xitlhavelo xa gandzelo ra tihele!
Lexi i xirilo xa vana na vomanana
Hi karhele ku mitisiwa swilo hi nga gayelangi
Hi karhele ku xanisiwa, hi onheriwa timfanelo ta ximunhu

Le makhwatini ko mbvee!
Hi khumbumeta tinhompfu hi swandla!
Hi mintsumbu ya ticece mi nga pfinya mi dlaya
Le “charge office” vavasati yo khuluka yi khapa
Va pfumala na moya wo ringana ku vika mahlomulo ya vona

Hakunene! Tolo u fambile na swa yena
Namuntlha n’wana u pfinya mana wa yena
Tatana a xinyata a pfinya n’wana wa kwe wa ngati!
U kwihi wanuna wa Afrika, nhloko ya muti
Wanuna wa Afrika u borile, a nyakapfala mbilu

Wa xiximisa bya thyaka ra le mahosi…..!
Ku languta yena hi mahlo i ku thyakisa mahlo!
Lexi i xirilo xa ticece na vomanana
Mihloti yi khuluka yi pfumala va suri!

HI SHADDY MAVASA