Leri I Rhambu Ra Marhambu Ya Mina

Mahlo onge i tindhulwana, ya basile bya gamboko
Ntima hi lowo vona, xi lehile hi vomu,
Misisi yi lehile yi hima makatla
Xinhopfana onge xi lo vatletiwa
Xiritwana xi larile bya Dzima Muhulu, a pfhateriwe minkolo
Xo nyandla-nyandla! onge i lumpfani

Mbilu yo thya loko ndzi ku vona
Minkolo ya tsakama hambi yi omile
Xinkhwidayana xa xurha hi xihlambanyo xa rirhandzu
Mbilu yi ba magandlati yi tlangela rirhandzu
Leri i rhambu ra marhambu ya mina….

Ndzi ku hlawurile exikarhi ka vanhwana
Ndzi ku thya vito ra nkatanga
Wena u ndzi thya leswaku ndzi wanuna
Lawu ri hundzuke yindlu
U eneta mahlo ya nga, ndza ku rhandza Makhanani…

A hi teki rendzo ra vutomi swin’we
A hi vi vanghana va vusiku na nhlekanhi
Hi aka ximutana xa hina xi tiya
Swivulavula a hi maxaka eka hina
Kambe ntsako u amukeriwini emutini wa hina
Leri i rhambu ra marhambu ya mina…

Ndzi tivule wanuna siku u nga hlamula u ku:
Ndza ku rhandza, timhuti ti khana hi ntsako
Ndzi tlangela ku vuriwa wanuna
Xana i mani? A nga ndzi hambanyisaku na wena handle ka rifu
Ndza ku rhandza nkatanga
Leri i rhambu ra marhambu ya mina….
Katsaa!

HI MKHONGELO PRAYERS CHAVALALA
WA GIBSON