Buti Na Buti I Ntlawa Wa Vuyimberi Bya Xitsonga

Buti na Buti kumbe BnB i ntlawa wa vuyimbeleri bya Xitsonga lowu nga nghena hi xidumo eka swa vuyimbeleri. Hina va ka N’weretinews hi tlhavula mutwa laha wu nga tlhava kona kasi mhaka hi sungula laha yi sunguleke kona. Loko u hundziwe hi xithuvi u nga vileli u lo jitama ehenha ka ntswamba wa vulombe. Buti na Buti i ntlawa lowu wu vumbiweke hi ku hlangana ka Lawrence na Sydney Chauke, ntlawa lowu wu fambisa hi Bumani Given Manganye. Buti na Buti va nhlonhloteriwe hi nhenha ya vuyimbeleri bya Xitsonga sirha Matshwa Bemunda. Gondzo ra vona ra vuyimbeleri ri sungule hi lembe ra 2007, ku fika sweswi va na tsevu wa tialibamu, ku nga leti landzelaku: 1. Mavarivari 2008. 2. Tiguluvha 2012. 3. Ximbhazimani 2013. 4. Cinderella 2015. 5. Vulavula moya 2016. 6. Dankie Nkatanga 2017.

’A swi nga olovi ku humelerisa Vunanga bya hina, hi hlanganile na swiganga swo tala, lama i marito lama humaka eka ntlawa lowu wu nga na vuswikoti byo hlanganisa mimpfumawulo hi ndlela ya xiyimo xa le henhla swinene. Vunanga bya hina byi kumeka eka tindhawu to hlaya laha tikweni kambe na le ka hina va nga byi kuma hi ku bela ritlingo eka nomboro leyi: 082 369 7037. Eka nkarhi wa sweswi hi nga vula leswaku leswi hi nga swi fikelela i ku va na “studio”, lexi eka xona hi kandziyisaka vunanga na vukorhokeri byin’wani ku katsakana na leswi landzelaku: CD Printing, Graphic Design na Photo Printing. Vunanga bya hina byi na dyondzo, hi rhandza leswaku varhandzi na vaseketeri va vunanga hi ku angarhela va dyondza ku hambanisa leswinene eka leswo biha, mhaka ya kahle hi leswi byi nga lulamela ku yingisieriwa hi munhu un’wani na un’wani, ku sukela eka n’wana loyi ntsongo ku fika eka vadyuhari.

“Eka malembe ya ntlhanu lama nga ta landzela varhandzi na vaseketeri va BnB kumbe vunanga hi ku angarhela va langutela ku kula ka ntlawa wa hina, hi lava leswaku hi va emilon’wini ku fana na swin’wani swiyimbeleri. Hi navela na ku hlula eka swin’wani swa swidlodlo swa masagwadi leswi nga kona laha tikweni swa vuyimbeleri. Eka nkarhi wa sweswi mintlhontlho leyi hi hlanganaka na yona i vaaka tiko lava va kandziyisaka vunanga bya hina va xavisa, hina vinyi hi nga vuyeriwi hi nchumu, onge mfumo wu nga nghenelela eka mhaka leyi. Lava va nga na norho wo landzela swa vuyimbeleri va nga ti tshuneta ekusuhi na lava nga na vuswikoti va ta kuma ku pfuneka. Kasi eka lava va nga ntlawa wa vuyimbeleri hi nga va tsundzuxa leswaku swi na nkoka ku khoma tinhlengeletano tanihi hi ntlawa mi burisana hi swiphitlo leswi mi nga na swona, hi wona murhi lowu hina va BnB hi tirhisaka wona naswona hi tshemba leswaku ntlawa wa hina wa ha tama wu va kona ku ya emahlweni. Eka varhandzi na vaseketeri va hina hi ri xandla ehenhla ka xin’wani xandla, BnB i BnB hi vukona bya n’wina. Lava va tsakelaku ku tihlanganisa na hina hi swa bindzu ra vuyimbeleri va nga endla tano hi ku bela ritlingo eka nomboro leyi: 082 369 7037 kumbe email: bnbmediasayouth@gmail.com

Hi Shaddy Mavasa (The Author)