Mandla Mavoko I Muyimbeleri Wa Vunanga Bya Xitsonga

Mandla Mating wo huma emugangeni wa ka Siyandhani kusuhi na doroba ra le Giyani, loyi a tiviwaku hi vito ra Mandla Mavokoo eka swa vuyimbeleri i muyimbeleri wa vunanga bya Xitsonga loyi a nga tiendlela vito hi yimbelela a tlhela a cina vunanga bya kwe hi ndlela ya xiyimo xa le henhla swinene. A hi ku saseka ka swona ku sungula mhaka laha yi sunguleke kona, ku vula ka swiphopha-mberha mutwa va tlhavula laha wu nga tlhava kona. U sungurile tidyondzo ta yena exikolweni xa le hansi xa Siyandhani Primary School, ku suka kona a yisa tidyondzo ta yena emahlweni exikolweni xa le henhla xa Famandha High School. Gondzo ra kwe ra vuyimbeleri ri sungula hi lembe ra 2015, laha a nga nhlonhloteriwa ngopfu hi varhandzi na vaseketeri va vuyimbeleri va vunanga endzhaku ka loko va n’wi vonile a ri karhi a cina na Boti Ready, un’wani wa swiyimbeleri swa vunanga bya Xitsonga loyi a nga tiendlela vito eka swa vuyimbeleri, a va cina swin’we malembe ndzhaku, hi lembe ra 2010. “Ndzi hlanganile na mintlhontlho loko gondzo leri ra ha sungula, yin’wani ya mintlhotlho a ku ri ku pfumala mali yo kandziyisa kambe nyiko yi ri kona, lawa i marito lama humaka enon’weni wa xiyimbeleri lexi xi nga tiendlela vito eka swa vunanga. Ku fika sweswi ndzi na tialibamu timbirhi, ku nga: Mandla Mavokoo Vol 1 leyi nga thyiwa Mavokoo na Mandla Mavokoo Vol 2 leyi nga thyiwa Ncino wa na vusiku. Vunanga bya mina byi kumeka eswitolo swo xavisa vunanga na le ka mina. Eka vunanga bya ndzi tirhe na Hangalasa, Shindendefu Witness Mtileni, kasi eka Vol 2 ni tirhe na Magezi Chauke na T-man. Ku yisa emahlweni xiyimbeleri lexi nga xirhandzwa eka varhandzi va vunanga hi mincino ya xona xo hlawuleka. Ndzi rhandza ku fikelela swo tala eka vuyimbeleri ku fana na ku vitana eka ti festival leti kulu laha ndzi suriwa nyuku hi mali. Vaseketeri va mina va nga langutela swo tala eka malembe lama nga ta landzela, ndzi ta va tsakisa hi laha ku nga heriku naswona Mandla Mavokoo u ta kula hinkokwalaho ka seketelo wa n’wina. Loko hina va ka N’weretinews hi vutisa xiyimbeleri lexi mayelana na piracy, xi te: mhaka ya piracy yi vuyisela swiyimbeleri endzhaku tani hi leswi swi durhaka ku endla vunanga. Kasi eka lava va rhandzaka ku landzela swa vuyimbeleri va fanele ku tiyimisela va tlhela va tirha hi matimba, va ta endla vunanga lebyi nga ta rhandza hi vanhu hinkwavo. Eka swiyimbeleri kulobye a hi khomaneni hi rhandzana hi tlhela hi pfunana eka swa vuyimbeleri. Rito ra mina hetelela i xikombelo eka varhandzi na vaseketeri va mina, mi nga xavi ma ten-ten, xavani vunanga eswitolo swo xavisa vunanga na le ka mina ndzi ta kula. Inkomu!
Hi Shaddy Mavasa