Pfukani Vatsonga Machangana Bulu 06 -2018

1. Ku Xeweta:

Ndza mi losa

N’hweti ya Khotavuxika yi tiviwa tani hi n’hweti ya lavantshwa. Siku ra ti 16 ri na matimu lamakulu, lawa khumbheke vutomi bya ma Afrika Dzonga hinkhwavo, lavantsongo na lavakulu. Lava hi nga va timbhoni a hi dyondziseni lavantshwa ku tiyimela leswaku va tintshunxa eka minhlohletelo yo biha leyi va tlheriselaka evuhlongweni.

2. Tinhlengeletano ta Pfukani Vatsonga Machangana:

Nhlengeletano ya Khotavuxika ya EXCO yi ta va kona hi ti 16 hi awara ya mbirhi (14h00) eJoni. Lava va tsakelaka ku va na hina, a va hi tivise hi ta va nyika vuxoko-xoko bya ndzhawu.

3. DTT/Digital Terrestrial Television:

Tani hi laha mi tweke ku hundzuluxiwa ka Khabinete, Man. Nomvula Mkonyane hi yena minisitara lontshwa eka ndzawulo ya swa Vuhlanganisi. Se kuna xivumbeko xintshwa mayelana ni vuhaxi bya DTT, va nhlangano wa USAASA (Universal Service & Access Agency of South Africa) hi vona lava a va nyikiwile vulawuri byo humelerisa swibokisani leswi vuriwaka ti STB, kambe ku na ku nonoka na nkwetlembetano. Ministara Mkonyane u vula leswaku ntirho wa vuhundzuluxi wu lava swiyenge hinkwaswo swa mabindzu tani hi leswi mfumo wu nga ta ka wu nga swi koti wu ri woxe. Hi ta rhiya ndleve ku twa leswaku ku ta endliwa yini ku ya emahlweni.

4. Miletelodyondzo

Ku landzelerisa na CRL hi miletelodyondzo lowu va nga hi tshembisa wona swa ha ya emahlweni, hi ta mi tivisa loko ku ri na hungu rintshwa.

5. A mi swi tiva ke?

Hungu rintshwa hileswaku, hi vile na mbhurisano eka CAPS online Radio hi Ravumune wa ti 7 Khotavuxika 2018. Xiyanamoya lexi, xi vonile hungu leri hangalasiweke hi phephahungu ra Capricorn Voice eka nhlengeletano ya hina yo sungula ya vatsari eGiyani, a kuri hi Ravumune hi 2014. Xihlanganisi lexi xi nga mi fikisa eka hungu leri. https://capricornreview.co.za/26832/writers-work-for-xitsonga-on-tv/

Khanimamba
Tat. SMS Khosa Mutshamaxitulu: Pfukani Vatsonga Machangana Riqingho: 083 304 2469-Vodacom Imeyili: Supasem@gmail.com Website: www.pvm.org.za Loko u ri na xo xi vula loko u nga xi vuli xi ta vuriwa hi mani?