Vhumbha-Vhumbha Dzenengela i mani?

I mani loyi a nga vulaka leswaku risimu ro hisa ra xirhandzwa ra Dzenengela a nga ri tivi ke? U ta va a hanya eka yihi misava ya kona. Loko u hundze hi xithuvi, u nga vileli, hina va ka N’weretinews hi ri u lo jitama ehenhla ka ntswamba, tshama ehansi u ku mbaa!  Hi ku phamela swakudya leswi u nga ta ti luma na tintiho. Hi vile na nkateko wo bula na Enock Mathebula loyi a tiviwaka hi vito ra Enock Mateki eka swa vuyimbeleri, kasi alibamu yona hi yoxe yi thyiwe Enock Mateki na Petunia, Dzenengela Vol 1 leyi nga huma hi lembe ra 2018. Leyi nga swekiwa hi voko ra vutshila, eka Swa Mateki Music Production. Alibamu leyi nga khoma tinsimu to hisa swinene ku katsa na Kulungwani wa Dzonga, Ncica xi tayela, Mulamula yi ta fana na America, Zengendela Remix, Goalkeeper na tin’wani to tala.   Veri mutwa va tlhavula laha wu nga tlhava kona, kasi mhaka hina hi sungula laha yi sunguleke kona.

Enock Mathebula wo huma le ka Mulamula eMagangeni, I muyimbeleri wa vunanga bya Xitsonga loyi a nga ndzawuta hi alibamu ya kwe yo hisa leyi endzeni ka yona yi nga na risimu ra xirhandzwa, risimu leri un’wani na un’wani a salaka a ti hluva voya a ti vutisa leswaku i mani xiyimbeleri lexi nga ba njamba leyi, leri nga thyiwa Dzenengela ri tlhela ri va rona vito leyi alibamu leyi. U sungurile tidyondzo ta yena exikolweni xa le hansi xa Mahlepfunye Primary School, ku suka kona u yise tidyondzo ta yena exikolweni xa le henhla xa Photani High School.

“Gondzo ra mina ra vuyimbeleri ri sungule hi lembe ra 2015, ndzi nhlohloteriwe hi ntlawa wa Limpopo Poison, hi swiyimbeleri swo fana na Benny Mayengani. Ntlhontlho lowu ndzi nga hlangana na wona i ku hetiwa matimba hi swivulavula leswi a swi nga aki, kambe a ndzi helangi matimba, ndzi tirhe hi matimba ku fika laha namuntlha ndzi nga phamela varhandzi na vaseketeri va vunanga hi alibamu yo hisa yi tlhela yi va xirhandzwa, Ku vula Enock Mateki, xiyimbeleri xa vunanga bya Xitsonga lexi nga hlamarisa votala hi vutshila bya xona byo hlanganisa swichayachayani swi humesa mpfumawulo lowu namuntlha hi baka nenge ku buluka phaxani na rona ro hlantsweka ra Petunia.  Vunanga bya mina byi kumeka eka hina vinyi ntsena, swa ha ri ntlhontlho swinene ku hangalasa vunanga leswaku byi ta fikilela vanhu hinkwavo. “Lexi ndzi nga xi fikilela eka swa vunanga i ku burisana na xitichi na Mala FM na N’weretinews hi alibamu ya mina, leswi swi vula swikulu eka mina. Lama i marito lama humaka eka nomu wa xiyimbeleri lexi. Lexi ndzi rhandzaka ku xi fikilela eka vunanga i ku hlawuriwa ndzi ya lwela masangwadi. Leswi varhandzi va vunanga va swi kumaka loko va yingisela vunanga bya mina i dyondzo ndzi tlhela ndzi endla na tinsimu to tsaka leti vanhu va ti rhandzaka swinene.

Ndzi nga ku eka mhaka ya piracy tani hi muyimbeleri yi ndzi vona hi yi tshikelela swinene hinkuva vunanga bya hina byi tlangiwi hi matimba swinene kambe hina a hi vuyeriwa hi nchumu. Eka malembe lama ntlhanu lama taku ndzi tshembisa varhandzi na vaseketeri va mina tinjamba na ku tirha hi matimba ku vona leswaku vito ra mina ra kula eka swa vuyimbeleri. Ndzi tlhela ndzi navela ku ti kuma ndzi ri mufambisi wa khamphani yo kandziyisa vunanga ndzi tlhela ndzi humelerisa swiyimbeleri swo hlaya. Xin’wani lexi varhandzi na vaseketeri va mina va nga xi tiviku hi mina hi leswaku ndzi muvatli hi tlhelo ndza dirowa na ku vumba. Lava nga na norho wo landzela nyiko ya swa vuyimbeleri ndzi nga va tsundzuxa leswaku va ntumbuluxa vunanga bya mina ku ri ku landzelela swiyimbeleri swin’wani. Eka swiyimbeleri kulobye ndzi ri a hi rhandzaneni hi tirhisana na ku yimbelela vunanga bya kahle bya dyondzo na ku tsakisa varhandzi va vunanga. Ndzi na norho wo tirha na swiyimbeleri swin’wani, ndzi tsaka swinene loko ndzo va na nkateko wo tirha na Khombo Shirimani. Lava va nga na ku tsakela ku ti hlanganisa na mina hi swa bindzu ra vuyimbeleri va nga ndzi kuma eka nomboro leyi: 072 182 9508 kumbe eka Facebook: Enock Mateki.

 

Hi Shaddy Mavasa